შეარჩიე სარეცხი მანქანა მოდუსთან ერთად

რემონტის შემდეგ, როცა საქმე საოჯახო ტექნიკაზე მიდგება, პირველი და ყველაზე მნიშვნელოვანი რაც გვახსენდება არის მაცივარი და სარეცხი მანქანა. მაღაზიებში შეხვდებით ტევადობით, პროგრამებით, ენერგოეფექტურობით, ფასით, დიზაინით და სხვა მახასიათებლებით განსხვავებულ მოდელებს. არჩევანის გაკეთება რომ არ გაგიჭირდეთ, გაეცანით ამ სტატიას, აქ დეტალურად განვიხილავთ ყველაფერს, რაც სარეცხი მანქანის შესარჩევად დაგჭირდებათ. 

სარეცხი მანქანის ტიპები

სულ ორი ძირითადი ტიპის სარეცხი მანქანა არსებობს: ზედა ჩატვირთვითდა ფრონტალური ჩატვირთვით.

• ზედა ჩატვირთვით: ასეთი მოდელები, ტრადიციულად პოპულარულია რამდენიმე მიზეზის გამო. ყველაზე მნიშვნელოვანი მიზეზი არის ის, რომ შედარებით ნაკლებ ადგილს იკავებს. ასევე არის ადვილი მოსახმარი, სულ რამდენიმე პროგრამა აქვს. ასევე ერთერთი მნიშვნელოვანი ფაქტორი არის ის, რომ შუა რეცხვის პროცესში შეგიძლიათ ჩაამატოთ სარეცხი.
• ფრონტალური - ანუ წინა ჩატვირთვით: თანამედროვე სარეცხი მანქანების 90%-ზე მეტი არის ფრონტალური ჩატვირთვით, იმიტომ რომ ის გაცილებით ეკონომიური და ეფექტურია ზედა ჩატვირთვასთან შედარებით. მოიხმარს ბევრად ნაკლებ ელექტრო ენერგიას, ბევრად ნაკლებ წყალს და ასევე გაცილებით უკეთესად რეცხავს სარეცხს. გარდა ამისა, ფრონტალურ სარეცხ მანქანებში გვხვდება ტევადობის ბევრად დიდი არჩევანი და მრავალფეროვანი პროგრამები.

ძირითადი მახასიათებლები, რომლებსაც უნდა მივაქციოთ ყურადღება 

1. ტევადობა:  არსებობს განსხვავებული ზომების სარეცხი მანქანები, ძირითადად 5-დან 12 კილოგრამამდე მერყეობს მათი ტევადობა. მაგალითად, თუ ცხოვრობთ მარტო, ან ცხოვრობთ ორნი, 5-დან 7 კილოგრამამდე ტევადობის სარეცხი მანქანა საკმარისი იქნება. თუ გყავთ ბავშვები, მაშინ სასურველია 8 კგ ან მეტი ტევადობის სარეცხი მანქანა შეიძინოთ. გირჩევთ, რომ იმაზე მაღალი ტევადობის სარეცხი მანქანა არ შეიძინოთ ვიდრე გჭირდებათ, იმიტომ რომ გექნებათ მეტი ელექტრო ენერგიისა და წყლის ხარჯი.
2. დოლურის ბრუნი წუთში: დოლურის ბრუნვის სიჩქარეზეა დამოკიდებული თუ რამდენად ხარისხიანად გაირეცხება სარეცხი და თუ რამდენად კარგად გაიწურება ის რეცხვის შემდეგ. რაც უფრო მაღალია ეს მაჩვენებელი, მით უფრო უკეთეს შედეგს ვიღებთ. თუმცა, გასათვალისწინებელია ისიც, რომ მაღალი ბრუნების შემთხვევაში შეიძლება დაზიანდეს ფაქიზი მატერიით შეკერილი ტანსაცმელი, ამიტომაც რეკომენდირებულია მივენდოთ სარეცხი მანქანის პროგრამებს, სადაც ავტომატურად განისაზღვრება თუ რომელი ტიპის ტექსტილი რამდენად სწრაფი ბრუნებით უნდა გაირეცხოს და შემდეგ კი გაიწუროს.
3. ენერგოეფექტურობა: ეს ერთერთი მნიშვნელოვანი ფაქტორია სარეცხი მანქანისა და ზოგადად საოჯახო ტექნიკის შერჩევისას. შეიძლება მაღალი ენერგოეფექტურობის მქონდე ნივთი უფრო მეტი ღირდეს, ვიდრე დაბალი ენერგოეფექტურობისა, მაგრამ გრძელვადიან პერიოდში ელექტრო ენერგიის ეკონომიით, ნამდვილად მოგებული დარჩებით.
4. ხმაურის დონე: ზოგიერთ სარეცხ მანქანას აქვს ინვერტორული ტიპის ძრავი, ასეთი მოდელები ბევრად ეკონომიური და უხმაუროა. ზოგადად, სარეცხი მანქანა ყველაზე ხმაურიანი არის სარეცხის გაწურვის დროს, სხვა შემთხვევებში კარგი ხარისხის თანამედროვე მანქანა არც ისე დიდ ხმას გამოსცემს. ჩუმ სარეცხ მანქანად ითვლება ის, რომლის ხმაურის დონე არ აღემატება 50 დეციბელს, ასეთი მოდელები შეგიძლიათ თამამად ამუშაოთ ღამით და დაძინებაშიც არ შეგიძლით ხელს.
5. რეცხვის პროგრამები: განსხვავებულ მოდელებიში, განსხვავებულ პროგრამებს გვთავაზობენ. მაგალითად ბამბის რეცხვის პროგრამა, სინთეტიკის, ფეხსაცმლის, თეთრეულის, აბრეშუმის და სხვა. რაც უფრო მრავალფეროვანი და რთულია პროგრამა, მით უფრო მეტია სარეცხი მანქანის ღირებულება, ამიტომ, მკაფიოდ უნდა გამოავლინოთ თქვენი საჭიროებები და შემდეგ დაიწყოთ შესაბამისი პროგრამების მქონე მოდელის შერჩევა.

სარეცხი მანქანის მოვლა

სარეცხი მანქანის შეძენის შემდეგ, აუცილებელია მას მოვუაროთ, რათა მრავალი წლის განმავლობაში შეუფერხებლად გვემსახუროს.

• დოლურის წმენდა: დოლურის რეგულარული წმენდა ხელს უშლის მასში სარეცხი საშუალებების, ჭუჭყის, ჟანგის ან რაიმე სხვა არასასურველის ჩარჩენას, რაც უსიამოვნო სუნს ან სარეცხი მანქანის დაზიანებას გამოიწვევს. ეს იმდენად მნიშვნელოვანი პროცესია, რომ ზოგიერთ მოდელს თვითწმენდის პროგრამაც კი აქვს.
• განიავება:  რეცხვის დასრულების შემდეგ, 10-15 წუთით კარი დატოვეთი ღია, იმისათვის რომ დოლურიდან სისველე გამოშრეს და არ გაჩნდეს უსიამოვნო სუნი.
• ფილტრები:  პერიოდულად ფილტრის შემოწმება და გაწმენდა საგრძნობლად გაახანგრძლივებს თქვენი სარეცხი მანქანის სიცოცხლისუნარიანობას.

სარეცხი მანქანის სწორად შერჩევა თავიდან აგარიდებთ სტრესს, ზედმეტ ხარჯებს, დაგიზოგავთ დროს და თანხას. ამ სტატიის წაკითხვის შემდეგ, ჩვენ უკვე ვიცით რა კრიტერიუმებით უნდა შევარჩიოთ ჩვენს საჭიროებებზე ზუსტად მორგებული სარეცხი მანქანა. ჭკვიანური გადაწყვეტილებები გეხმარებათ აშენოთ მომავალი დღეს და იცხოვროთ კომფორტულ გარემოში.